படங்களைப் பார்த்ததும் அதிர்ந்துபோனேன். ஆறு அங்குல வெள்ள நீர் எங்கள் ஒளிபரப்பு மையத்தினுள் கரைபுரண்டு வந்தது; பிரதான ஒளிபரப்பு மையத்தின் முக்கிய வண்ணச் சுவருக்கு நிரந்தர சேதத்தை ஏற்படுத்தியிருந்தது. ஒரு படத்தொகுப்பு (editing) அறை மற்றும் ‘UPS Power’ மின்சார இணைப்பு அறை ஆகியவை இரண்டடி தண்ணீர் வெள்ளத்தால் பாதிக்கப்பட்டன. எங்கள் தொழில்நுட்ப வல்லுநர்கள் இரண்டு மாதங்கள்வரை 24 மணி நேரமும் உழைத்து அத்தண்ணீரை வெளியேற்றினர். இந்த அறிக்கையால் நான் மனம் உடைந்தேன். இருப்பினும், மின்சார இணைப்பு அறை தண்ணீருடன் தொடர்பு கொண்டு வெடிக்காமல் அல்லது தீப்பிடிக்காமல் பாதுகாக்கப்பட்டது தேவனின் கிருபையே.

நான் லாவோஸில் உள்ள வியன்டியனில் தலைகுனிந்து, “இப்போது நான் என்ன செய்யவேண்டும், ஆண்டவரே?” என்று கேட்டேன். ஆண்டவர் தம் திட்டத்தைத் தெள்ளந்தெளிவாக வெளிப்படுத்தினார். அதற்கு அவர், “அங்கிருந்து வெளியேறு! நீ ஒரு நிலத்தை வாங்கி நிரந்தரக் கட்டிடம் கட்ட வேண்டிய நேரம் வந்துவிட்டது” என்றார்.

அந்த உத்தரவினால் உற்சாகமடைந்த நான், எனது ஊழியர்களை அழைத்து, பொருத்தமான இடத்தில் நிலத்தைத் தேடும்படி அவர்களுக்கு அறிவுறுத்தினேன். வியட்நாமில் இருந்து நான் மியான்மாருக்கு ஊழியத்திற்காகச் சென்றேன். இந்தத் திட்டத்தைப் பற்றி ஜெபித்துக்கொண்டிருந்தபோது, 2007-இல் “கட்டிடம் கட்டும் நேரம் வரும்போது மீண்டும் வருவேன்” என்று தூதன் என்னிடம் சொன்ன தரிசனம் எனக்குத் திடீரென்று நினைவுக்கு வந்தது. மீண்டும் அந்தத் தூதனின் வருகை இல்லாமல் நான் எப்படி இந்தத் திட்டத்தைத் தொடங்கமுடியும்? எனவே நான் காத்திருந்தேன்.

டிசம்பர் 4, 2015 அன்று காலை, மியான்மாரில் ஓர் ஊழியப் பயணத்தை மேற்கொண்டிருந்தபோது, என் வலது பக்கத்தில் ஒரு பிரசன்னத்தை உணர்ந்தேன். நான் கண்களைத் திறந்தபோது, ஒரு தூதனைக் கண்டு இன்ப அதிர்ச்சி அடைந்தேன். அவருடைய முதல் கேள்வி, "என்னை அடையாளம் தெரிகிறதா?" என்பதுதான். அவர் சிரித்த முகத்தைப் பார்த்த நான், “நிச்சயமாக அடையாளம் தெரிகிறது” என்றேன். "2007-இல் ஏஞ்சல் டிவியின் கட்டிடத் திட்டதிற்கான திட்டங்களை என்னிடம் கொண்டு வந்த தூதன் நீர்தான்" என்றேன். அவர் சிரித்துக்கொண்டே, “கட்டிடத்திட்டம் அங்கீகரிக்கப்பட்டதாகச் சொல்ல நான் பிதாவினால் அனுப்பப்பட்டேன். அதை முடிக்க உங்களுக்கு அதற்கான ஆதாரங்களும் உதவியும் வழங்கப்படும்" என்றார். இதனால் நான் மகிழ்ச்சியடைந்தேன், உடனடியாகப் பணியில் ஈடுபடத் தொடங்கினேன்.

கடைசி நாட்களில் கர்த்தருடைய சேனை உருவாக்கப்பட ஒரு இடத்தை கட்டி எழுப்புங்கள்!

இயேசு ஊழியத்தின் தலைமையகத்தில் அதிநவீன கலை மைய நிலையம் மற்றும் தீர்க்கதரிசன பயிற்சி மையமும் இருக்கும். உலகெங்கிலும் உள்ள மக்கள் கர்த்தருடைய வழிகளையும், அவரின் ஆழமான இரகசியங்களையும் கற்றுக்கொள்வதற்கும், அவருடைய பிரம்மிப்பூட்டும் வல்லமை மற்றும் மகிமை விவரிக்கப்படுவதைக் காண்பதற்கும் வருவார்கள்.

1983 நவம்பரில் நான் தெளிவாகப் பார்த்த ஒரு தரிசனம் இப்போதுதான் எனக்குப் புரிகிறது. ஒரு ஜெபக்கூட்டத்தில் நான் இருப்பதைப் பார்த்தேன். திடீரென்று, புனித சாது சுந்தர் சிங் பிரார்த்தனை மண்டபத்திற்கு வெளியே வந்து நிற்பதைக் கண்டேன். அவருடைய ஆசிர்வாதத்தைப் பெற நான் அவரை நோக்கி ஓடினேன். அவர் என்னை ஆசீர்வதிக்கக் குனிந்தார், பின்னர் என்னைத் தூக்கி தனது தோள்களில் உட்கார வைத்தார். நான் கீழே பார்த்தபோது, நான் இப்போது பரிசுத்த யோவான்ஸ்நானன் தோள்களில் அமர்ந்திருப்பதைக் கண்டு அதிர்ச்சியடைந்தேன்.

யோவான்ஸ்நானன் இன்னும் என்னைத் தம் தோளில் சுமந்துகொண்டு ஓர் இருண்ட காட்டுக்குள் நடக்கத் தொடங்கினார். ஓர் ஒளிப்பந்து எங்களுக்கு முன்னால் சென்றது. அது வழியை ஒளிரச் செய்தது. சிறிது நேரம் நடந்த பின் ஒரு குறிப்பிட்ட இடத்தில் நிறுத்தி, என்னைக் கீழே இறக்கிவிட்டார். என் வலதுபுறத்தில் நன்கு ஒளிரும் பெரிய குகை ஒன்றைக் கண்டேன். அதில் ஆண்டவர் இயேசு ஒரு பெரிய பாறை மீது அமர்ந்திருப்பதைக் கண்டேன். அவரைச் சுற்றி ஏராளமான குழந்தைகள் இருந்தனர். அது ஏதோ ஒரு பயிற்சி மையம் என்று எனக்கு அப்போது தெரிந்தது. இப்போது, 33 ஆண்டுகளுக்குப் பிறகு, இந்தத் தரிசனத்தின் அர்த்தம் என்னவென்று எனக்குத் தெரிந்தது. கர்த்தர் தாமே தம் மக்களுக்குக் கற்பிக்க, பயிற்சியளிக்க மற்றும் அவர்களைத் தயார்படுத்துவதற்காக ஒரு பயிற்சி மையத்தை அமைக்கவேண்டும் என்று தேவன் விரும்புகிறார் (மீகா 4:2) என்பதை உணர்ந்தேன்.