இளைஞர் முகாம்

இமயமலை ஜோசுவா முகாம் கூட்டம் ’05

2005-ஆம் ஆண்டு முகாம் கூட்டத்தின் கருப்பொருள் 'அனைத்தும் புதிது' என்பதாகும். பல விஷயங்களில் இது உண்மையில் எங்கள் அனைவருக்கும், அதாவது இளைஞர்கள் மற்றும் கூட்டத்தைத் திட்டமிடுவதிலும் நடத்துவதிலும் ஈடுபட்டிருந்த எங்களுக்கு ஒரு புதிய வகையான அனுபவமாக இருந்தது.

கூட்டம் மேற்கு வங்காளத்தில் (இந்தியா) காலிம்போங்கில் 2005, ஜனவரி 7 முதல் 12 வரை நடந்தாலும், பல மாதங்களுக்கு முன்பே நிர்வாகப் பணிகள், தீவிர ஜெபம், உபவாசம், உதவியாளர்கள் மற்றும் ஊழியர்கள் முன்வருவது என அனைத்து ஆயத்தமும் பல்வேறு வகைகளில் தொடங்கியது. எவ்வாறாயினும், தேவன் செய்யவிருந்த பெரிய காரியத்தைக் காண நாங்கள் யாரும் உண்மையில் தயாராக இல்லை.

ஜனவரி 7-ஆம் தேதி முகாம் தொடங்கியது. அதிகாலையில், பங்கேற்பாளர்கள் ஆர்வத்தோடு பதிவு செய்யும் இடங்களில் குவியத் தொடங்கினர். மதியத்திற்கு முன்பே, இடம் நிரம்பிவிட்டது. கிடைக்கக்கூடிய ஒவ்வோர் இருக்கை மற்றும் தங்கும் இடம் நிரப்பப்பட்டது. ஆனால் மக்கள் கூட்டம் கூட்டமாக வந்துகொண்டே இருந்ததால் அவர்களுக்குக் கலையரங்குகளில் இடமோ, விடுதியில் தங்கும் வசதியோ இல்லை. மேலும் நாற்காலிகள் விரைவாகக் கலையரங்கத்திற்குள் கொண்டு வரப்பட்டன. மாலையில், இன்னும் பல நாற்காலிகள் போடப்பட்டன. அடுத்த நாள் வேறு வழியின்றி மக்களை மேடையிலும் உட்கார அனுமதித்தோம். கடந்த ஏழு வருடங்களாக எங்களின் முந்தைய கூட்டங்கள் எதிலும், வாலிபர்கள் மற்றும் இளைஞர்கள் தேவனுக்காக இவ்வளவு வாஞ்சையுடன் இருப்பதை நாங்கள் பார்த்ததில்லை. அவர்கள் கூட்டத்தில் இருக்க ஆசைப்பட்டார்கள். நிர்பந்தத்தின் காரணமாக, தாமதமாக வந்த பலர் திருப்பி அனுப்பப்பட்டனர்.

இமயமலைப் பகுதி முழுவதிலுமிருந்து இளைஞர்கள் வந்தனர்: சிக்கிம், டார்ஜிலிங், குர்சியோங், கலிம்போங், சிலிகுரி, டியோர்ஸ் மற்றும் அண்டை நாடுகளான நேபாளம் மற்றும் பூட்டான் மற்றும் பீகார் கூட. 95% பேர் முதல் முறையாக இந்த முகாமில் கலந்து கொண்டனர்.

ஜோசுவா பாடகர்களின் உற்சாகமான ஆராதனை, முதல் அமர்விலிருந்தே கலையரங்கத்தில் தேவனின் பிரசன்னத்தைக் கொண்டு வந்தது. ஷோஃபர் வாத்தியம் ஊதப்பட்டு, சாது ஐயா இயேசுவை "கடா" (பாரம்பரிய பட்டுத் தாவணி) உடன் வரவேற்றபோது, முழுச் சூழலும் திடீரென மாறியது. தேவன் எங்கள் நடுவில் நடமாடுவதை உண்மையில் உணர முடிந்தது!

முதல் செய்தியில்,1997-இல் தேவன் அவருக்கு வெளிப்படுத்தியபடி, ஜோசுவா முகாம் சந்திப்பின் நோக்கத்தை சாது ஐயா பகிர்ந்து கொண்டார். ‘இளைஞர்கள் மூலம் முழு இமயமலைப் பகுதியையும் தொட வேண்டும்’ என்பதே தேவனின் நோக்கமாகும். ‘தங்கள் வாழ்க்கையைக் கர்த்தருக்குக் கொடுங்கள்’ என இளைஞர்களைத் தேவனிடம் திரும்புமாறு அவர் அறிவுறுத்தினார். பல நூறு இளைஞர்களும் தேவ குரலுக்குச் செவி சாய்த்து எழுந்தனர்.

அடுத்த நாளில், தேவனின் மற்ற ஊழியர்கள் அபிஷேகம் செய்யப்பட்ட செய்திகளைப் பகிர்ந்துகொண்டனர். தேவ செய்தி பெரிய மாற்றத்தைக் கொண்டுவந்தது. REV. ஜோஸ் ரோக்கோ பரிசுத்ததைப் பற்றி போதித்தார்; REV. ஜாக் இயோ தேவனின் தந்தைத்துவத்தைப் பற்றிப் பேசினார்; REV. ஸ்டெல்லா ரோக்கோ மக்களுக்கு ஜெபிக்கக் கற்றுக் கொடுத்தார்; மற்றும் திரு. சில்வானஸ் தமாங் தேவனின் வாசஸ்தலமான பெத்தேலைப் பற்றிப் பேசினார்.

ஆராதனை மற்றும் தேவ வார்த்தையைப் பகிரும்போது, மக்கள் தேவனை விசுவாசித்து ஒப்புக்கொடுத்தனர். அவர்கள் தாங்கள் வாழும் பாவமான (போதைப்பொருள், மது, பாலியல் ஆசை) வாழ்க்கையிலிருந்து மனந்திரும்பத் தொடங்கினர். நூற்றுக்கணக்கானோர் அன்றிரவு தங்களை அடிமைத்தனத்திலிருந்து தேவன் விடுவித்தார் என சாட்சி கூறினர்.

திருமதி அமுதா 'பாலியல் மற்றும் தூய்மை' குறித்த பட்டறையை நடத்தினார். அவர் இளைஞர்கள் எதிர்கொள்ளும் பிரச்சினைகளை வெளிப்படையாகவும் நேர்மையாகவும் கையாண்டார். இந்தப் பட்டறையின் மூலம் தேவன் தங்கள் வாழ்க்கையை எப்படித் தொட்டார் என்பதைப் பல இளைஞர்கள் வெளிப்படையாக ஒப்புக்கொண்டனர்.

பரிசுத்த ஆவியின் ஞானஸ்நானத்திற்காக ஜெபிப்பதற்காக அர்ப்பணிக்கப்பட்ட பகுதி, குறிப்பாக வல்லமை வாய்ந்த தருணமாக இருந்தது. சாது ஐயா தலைமையில் சக பங்கேற்பாளர்கள் இதர வாலிபருக்காக ஜெபித்தனர். அவ்வேளையில் நூற்றுக்கணக்கான இளைஞர்கள் பரிசுத்த ஆவியின் ஞானஸ்நானம் பெற்றனர். தேவனின் அபிஷேக வல்லமை மக்கள் மீது இறங்கியது. கர்த்தரின் மகிமை மிகவும் பலமாக இருந்தது. மக்கள் எல்லா இடங்களிலும் பரிசுத்த ஆவியின் நிரப்புதலால் விழுந்தனர். சாது ஐயா மூலம் பரிசுத்த ஆவியானவர், பல்வேறு நபர்களுக்குப் பல தனிப்பட்ட தீர்க்கதரிசனங்களை வழங்கினார்.

ஜோசுவா முகாம் கூட்டத்தின் ஆறு நாட்கள், 1997-இல் சகோதரர் சாது அவர்களுக்கு தேவன் காட்டிய தரிசனத்தை அதிக அளவில் நிறைவேற்றியது.

இந்திய, ஆஸ்திரேலிய, அமெரிக்க மற்றும் சிங்கப்பூர் சகோதரர்களை உள்ளடக்கிய ஆராதனைக் குழு, நடனக் கலைஞர்கள் மற்றும் ஊழியக் குழு ஆகியோரின் கடின உழைப்பு மற்றும் அவர்களின் பணிவான ஊழியத்தால் உண்மையில் மக்கள் ஆசீர்வதிக்கப்பட்டனர்.

தேவனுக்கே மகிமை உண்டாவதாக!

பெண்கள் மாநாடு

"தெபோராலே எழும்பு!" மகளிர் மாநாடு ’05

தெபோராள், வேதாகமத்தில், தேவனுக்கு ஊழியம் செய்ய அழைக்கப்பட்ட ஒரு பெண்ணின் முன்மாதிரியாகத் திகழ்கிறார். பண்டைய யூத சமுதாயத்தில், இஸ்ரேலின் கோத்திரங்களில் பெண்ணை எண்ணப்படுவதற்குத் தகுதியாகக் கூட கருதவில்லை. ஆயினும், தேவனின் அங்கீகாரத்துடன் சிசெராவைத் தெபோராள் தோற்கடித்து வலுவான சமூக விதிமுறைகளை உடைத்தாள் (நியாயாதிபதிகள் 4:1-23).

பல ஆண்டுகளுக்கு முன்பு, சகோதரி அமுதா அருணாசலம் அவர்களுக்குத் தேவன், குடும்பம் மற்றும் சமுதாயத்திற்குச் சேவை செய்வதற்கும், சமூகத்தின் தவறான நடத்தையால் ஏற்பட்ட காயங்களைக் கட்டுவதற்கும், ஆவிக்குரிய ரீதியில் பெண்ணைச் சுதந்திரமாக மாற்றுவதற்கும் இதே போன்ற தரிசனத்தை வழங்கினார்.

நான்காவது முறையாக 2005-இல் தெபோரா மாநாடு மேற்கு வங்காளத்தின் (இந்தியா) காலிம்போங்கில் நடைபெற்றது. தேவ தரிசனம் ஒரு பெரிதான வகையில் நிறைவேறுவதைக் கண்டோம். ஜனவரி 14 முதல் 16 வரை, இமயமலைப் பகுதி முழுவதிலும் இருந்து சுமார் 350 பெண்கள் தேவனை ஆராதிக்கத் திரண்டு வந்தனர். அவர்கள் வெவ்வேறு பிரிவுகளிலிருந்து வந்தவர்கள். ஆனால், அவர்கள் தேவனுக்கு முன்பாக ஒரே பெண்களாக வந்தனர். மாநாட்டை சாது சுந்தர் செல்வராஜ் துவக்கி வைத்து, கர்த்தரின் பார்வையில் பெண்கள் விஷேஷமானவர்கள் என்றும், பெண்கள் தேவனின் தனித்துவமான படைப்பு என்றும் கூறினார். முகாமின் முதல் மாலை வேளையிலேயே, பல ஆண்டுகளாக அவர்கள் சுமந்துகொண்டிருந்த மனக்காயங்களைத் தேவன் குணப்படுத்தினார்.

அடுத்த நாள், திருமதி அருணாசலம் மரணிக்கும் உலகில் வாழ்க்கையைப் பிறப்பிக்க தேவன் விரும்புவதால், மக்களுக்கு உயிர் கொடுக்கப் பெண்களைப் பயன்படுத்துகிறார் என்ற அபிஷேகமிக்க போதனையைப் பகிர்ந்து கொண்டார். அவர் தனது போதனையை முடித்தவுடன், தேவனிடமிருந்து ஒரு தொடுதலைப் பெற மக்களை அழைத்தார். நூற்றுக்கணக்கான பெண்கள் முன்வந்தனர் மற்றும் தேவனின் வல்லமை வாய்ந்த தரிசனம் அங்கு விளங்கினது.

போதகர் சரோஜ் ரோங்கோங்கின் போதனைகளாலும் மக்கள் பெலப்பட்டனர். அவர் இளவரசியின் பாத்திரத்தைப் பெண்கள் எவ்வாறு ஏற்றுக்கொள்கிறார்கள், அதனால் மன்னரின் சார்பாக எவ்வாறு செயல்படலாம் என்பதையும் பகிர்ந்து கொண்டார். நாம் பேசும் வார்த்தையின் மூலம் கிடைக்கும் தீர்க்கதரிசனம் மற்றும் ஆசீர்வாதத்தின் முக்கியத்துவத்தையும் அவர் கற்பித்தார்.

திருமதி ஹீதர் ரெக்ஸ் ஊழியம் குறித்த ஒரு விழிப்புணர்வுப் பாடத்தைப் பகிர்ந்தார். அவர் நேபாள மக்களிடையே வாழும் இங்கிலாந்தைச் சேர்ந்த மிஷனரி என்பதால், அவரது செய்தி மக்களை வல்லமை வாய்ந்த முறையில் சந்தித்தது.

பெண்களைத் தேவன் எப்படிப் பார்க்கிறார் என்பது பற்றி போதகர் ஸ்டெல்லா போதித்தார். தாழ்வு மனப்பான்மையை மேற்கொள்வது பற்றியும் போதகர் ஸ்டெல்லா போதித்தார்.

மாநாட்டின் மிக முக்கியமான அம்சங்களில் ஒன்று ஜோசுவா பாடகர்களின் தலைமையில் நிகழ்ந்த வல்லமை நிறைந்த ஆராதனை. கர்த்தருக்கு முன்பாகப் பெண்கள் பாடி, ஆரவாரமான நடனத்தோடு ஆடும்போது, தெய்வீக மகிமை மக்கள் மீது இறங்கியது. பாவங்கள், அடிமைத்தனங்கள், காயங்கள், மனச்சோர்வு மற்றும் பயம் ஆகியவற்றிலிருந்து விடுதலை பெற்றனர்.

பல பெண்கள் தேவன் தாங்கள் எவ்வகையில் ஊழியம் செய்ய வேண்டும் என விரும்புகிறாரோ, அவ்வகையில் ஊழியம் செய்ய தங்கள் வாழ்க்கையை அர்ப்பணித்தார்கள்.

தேவனுக்கே மகிமை உண்டாவதாக!

நல்லது, உத்தமமும் உண்மையுமுள்ள ஊழியக்காரனே!

கிரேக்க மொழியில் ‘அந்திரேயா’ அல்லது 'ஆண்ட்ரூ' என்றால் 'ஆடவரின் நற்பண்புகள் கொண்ட, ஒரு அழகிய தோற்றமும் துணிச்சலும் கொண்டவர் என்று பொருள். இது ஆண்ட்ரூ கர்தக் என்று அழைக்கப்படும் உயரமான, மெலிந்த மற்றும் அழகான இளைஞனை சரியாக விவரிக்கிறது. சாது சுந்தர் செல்வராஜ் அவர்களின் நெருங்கிய நண்பர்களில் ஒருவர் ஆண்ட்ரூ கர்தக்.

ஆண்ட்ரூ தனது கல்வியைக் காலிம்போங்கில் பெற்றார். அவர் ஒரு தெய்வீகக் குடும்பத்தில் வளர்ந்தாலும், 1988-இல் சாது ஐயா நடத்திய சுவிசேஷக் கூட்டத்தில் தான் கர்த்தராகிய இயேசுவைத் தனது சொந்த இரட்சகராக ஏற்றுக்கொண்டார். அவர் தனது வாழ்க்கையைத் தேவனுக்குக் கொடுத்த தருணத்திலிருந்து, ஊழியத்திற்கான தேவ அழைப்பை உணர்ந்தார். பின்னர் அவர் ‘இயேசு ஊழியத்தில்’ (Jesus Ministries) சேர்ந்தார். மற்றும் சாது ஐயாவின் முக்கிய ஊழியராகவும் அன்பான ஆவிக்குரிய மகனாகவும் ஆனார்.

அவர் சாது ஐயாவுடன் இந்தியா, நேப்பாளம் மற்றும் பூட்டானில் உள்ள இமயமலையின் தொலைதூர இடங்களுக்கு விரிவாகப் பயணம் செய்தார். ஒன்றாக, அவர்கள் ஏராளமான திபெத்திய துறவிகளுக்கும், மற்றும் நகரங்கள் மற்றும் கிராமங்களில் வாழும் பொது மக்களுக்கும் கிறிஸ்துவை அறிவித்தனர். அதுமட்டுமல்லாமல், அவர் ஹிசாப் பாடல் ஊழியத்திலும் ஈடுபட்டார். இந்தக் குழுவுடன் வட இந்தியாவின் பல்வேறு பகுதிகளுக்குப் பயணம் செய்து, கிறிஸ்து இயேசுவின் அன்பைத் தனது மெல்லிசைக் குரல் மூலம் நூற்றுக்கணக்கான மக்களுக்கு சென்றடையச் செய்தார்.

1992-இல் அவர் ஒரு வேதாகமப் பள்ளியில் கலந்துகொள்ள சிங்கப்பூர் சென்றார். அங்கு அவர் தனது அழகான வருங்கால மனைவி அமுதா அருணாசலத்தைச் சந்தித்தார். சிறிது காலம் பழகிய பின் இரு வீட்டாரின் ஆசீர்வாதத்துடன், அவர்கள் பிப்ரவரி 19, 1994 அன்று மகிழ்ச்சியுடன் திருமணம் செய்து கொண்டனர்.

ஆண்ட்ரூவுக்குத் திடீரென நுரையீரலில் கடுமையான தொற்று நோய் ஏற்பட்டது. சிங்கப்பூரிலும் இந்தியாவிலும் அவருக்கு நீண்ட காலம் சிகிச்சை அளிக்கப்பட்டாலும், அவரது உடல்நிலை மோசமடைந்து வந்தது. இந்தியாவில், சென்னையில் உள்ள மருத்துவமனையில் சிகிச்சை பெற்று வந்த இந்த இருளான காலக்கட்டத்திலும், அவர் தேவனிடம் ஏன் என்று ஒருபோதும் கேள்வி கேட்கவில்லை. மேலும், அவர் மனந்தளராது வேதாகமத்தைப் படித்து ஜெபத்திலும் ஆராதனையிலும் நேரத்தைச் செலவிட்டார். உயிருக்குப் போராடிக் கொண்டிருந்த அவர் முகத்தில் எந்த மனச்சோர்வும் தென்படவில்லை. தாம் ஆண்டவர் இயேசுவுக்கு உரியவர்; தேவன் தம் சித்தத்தின் படி செய்வது அவருடைய விருப்பம் என விசுவாசித்தார்.

1994 ஏப்ரல் கடைசி வாரத்தில் அவரது உடல்நிலை சற்று சீரடைந்தது. அது மருத்துவர்களை வியப்பில் ஆழ்த்தியது. நண்பர்கள் மற்றும் உறவினர்கள் அனைவரும் மிகவும் நிம்மதியடைந்து ஆண்ட்ரூவையும் அமுதாவையும் பார்க்க ஆவலுடன் காத்திருந்தனர். ஆனால் திடீரென மே 2-ஆம் தேதி அவரது உடல்நிலை மோசமடைந்தது. அமுதா, ஆண்ட்ரூவின் உடலில் சில மணி நேரம் மகிமையின் மேகங்கள் மிதப்பதைக் கண்டாள். மே 3, 1994 அன்று அதிகாலையில், ஆண்ட்ரூ தனது பந்தயத்தை முடித்துக்கொண்டு, ஆண்டவர் இயேசுவோடு இருக்க பரம வீட்டிற்கு அழைக்கப்பட்டார். ஆண்ட்ரூ, நோய்வாய்ப்பட்ட பல மாதங்களாக, தேவனைக் கேள்வி கேட்டதில்லை. “ஏன் எனக்கு இந்நிலை" என்று கேட்டதில்லை. "இது நியாயமில்லை" என்று ஒருபோதும் சொன்னதில்லை. கசப்புணர்வு மற்றும் கோபத்தை சுவாசித்ததில்லை. ஆண்ட்ரூ அல்லது அவரது அன்பு மனைவி அமுதா தோல்வியைச் சந்தித்தார்களா? இல்லை! ஆண்ட்ரூ கடைசிவரை கர்த்தருக்கு உண்மையாக இருந்தார். அவர் வெற்றி சிறந்தார். மரணத்திற்குக் கூர் இல்லை, பாதாளத்திற்கு ஜெயம் இல்லை, அது அவனை ஆட்கொள்ளாது (1 கொரி 15: 55-57).

ஆண்ட்ரூவின் வாழ்க்கை இன்றைய இளைஞர்களுக்கு பெரும் உத்வேகமாகவும் சவாலாகவும் இருக்கிறது. அவர் ஒரு ஜெயங்கொண்டவராக இருந்தார். வெற்றியாளராகவும், இறுதிவரை கிறிஸ்தவ நம்பிக்கையில் உறுதியாகவும் இருந்தார். அவர் தனது வாழ்க்கையில் ஒரு வெற்றி வீரராக இருந்தார். ஆண்ட்ரூ அழைக்கப்பட்டார், அவர் தேர்ந்தெடுக்கப்பட்டார், அவர் உண்மையுள்ளவராகக் காணப்பட்டார் (வெளி. 17:14). அவரைப் பற்றி ஆண்டவராகிய இயேசு உண்மையாகவே, "நல்லது, உத்தமமும் உண்மையுமுள்ள ஊழியக்காரனே, கொஞ்சத்திலே உண்மையாயிருந்தாய், அநேகத்தின்மேல் உன்னை அதிகாரியாக வைப்பேன்; உன் எஜமானுடைய சந்தோஷத்திற்குள் பிரவேசி" (மத். 25:23) என்றிருப்பார்.

சோரெங் ஜெபத் திருவிழா 2004

சோரெங், இந்தியாவின் சிக்கிமின் மேற்கு மாவட்டத்தின் துணைப் பிரிவுத் தலைமையகங்களில் ஒன்றாகும். பொதுவாக ஓர் அமைதியான மற்றும் மந்தமான நகரம் அது. நவம்பர் 3, 2004-இல் ‘சோரெங் ஜெபத் திருவிழா’ நடந்தது. சிறந்த பேச்சாளரின் கிறிஸ்தவ இசை ஒலித்தது மற்றும் அருகிலுள்ள இடங்கள் மற்றும் பிற வெளி மாவட்டங்களிலிருந்தும், அண்டை மாநிலமான மேற்கு வங்கத்திலிருந்தும் கூட மக்கள் வந்து குவிந்தனர்.

அவர்கள் நீண்ட தூரம் பயணித்திருந்தனர்; சிலர் வாகனங்களில் வந்தனர்; மற்றவர்கள் பல மணி நேரம் நடந்தனர். வாராவாரம் தொலைக்காட்சியில் பார்த்துவந்த 'குணமாக்கும் அன்பு' நிகழ்ச்சியைத் தொடர்ந்து, அவர்கள் அன்பிற்கும் மரியாதைக்கும் உரிய சாது சுந்தர் செல்வராஜ் அவர்களின் போதனையைக் கேட்க நேரில் வந்திருந்தார்கள்.

தொலைக்காட்சி ஊழியத்தின் மூலம் தேவன் இந்தப் பிராந்தியத்தில் உள்ள மக்களைத் தொட்டது தெளிவாகத் தெரிந்தது. பலருக்கு அத்திருவிழாவில் கலந்துகொள்வது ஓர் அரிய வாய்ப்பாக இருந்தது. தேவ மனிதரான சாது ஐயா தனிப்பட்ட முறையில் ஜெபிக்கும் கூட்டத்தில், அவர்கள் தங்கள் பிரச்சினைகளையும் துக்கங்களையும் தேவனிடம் கொண்டு வரமுடியும் என நம்பினர்.

நாங்கள் ஜெபம் நடக்கும் இடத்தை நெருங்கிய போது மாலை 5:30 மணி இருக்கும். எல்லாம் அமைதியாக இருந்தது. இமயமலையிலிருந்து நேராகக் குளிர்ந்த காற்று வீசியது. நாங்கள் காற்பந்தாட்ட மைதானமான ஜெப அரங்கிற்குள் நுழைந்தபோது, இதயத்தைத் தூண்டும் காட்சி எங்களை வரவேற்றது. நூற்றுக்கணக்கான மக்கள், அவர்களில் ஏராளமான மரபுவழி இந்துக்கள், பௌத்தர்கள் மற்றும் ஆன்மீகவாதிகள் எங்கள் வருகையை எதிர்பார்த்து ஏற்கனவே கூடியிருந்தனர். அவர்கள் தேவனிடம் இருந்து ஒரு செய்தியைக் கேட்க ஆவலுடன் காத்திருந்தனர்.

அன்று மாலை இயேசுவே உண்மையான தேவன் என்று சாது ஐயா பிரசங்கித்தார். அவர் இந்துவாக இருந்தபோது, தேவன் தனது வாழ்க்கையை எவ்வாறு தொட்டார் என்ற சாட்சியைப் பகிர்ந்து கொண்டார். ஏறக்குறைய இருநூறு பேர் இயேசுவுக்குத் தங்கள் வாழ்வை ஒப்புக் கொடுக்க எழுந்து நின்றனர். அடுத்த இரண்டு நாட்களுக்கு, சகோதரர் சாது, உண்மையான ஒளியாகிய தேவன், பாவத்தாலும் சாத்தானாலும் நம் வாழ்வில் வந்த இருளை எவ்வாறு அகற்றுகிறார் என்பதைப் பற்றிப் பிரசங்கித்தார். நோய்வாய்ப்பட்டவர்களைத் தேவன் எவ்வாறு குணப்படுத்த முடியும் மற்றும் பாவத்தால் சிதைந்த வீடுகளை எவ்வாறு சரிசெய்வார் என்பதையும் பற்றி அவர் கூறினார்.

சரீர சுகத்திற்கான ஜெபம் நடத்தப்படுவதற்கு முன்பு, சுமார் முந்நூறு பேர் எழுந்து நின்று, கிறிஸ்துவைத் தங்கள் வாழ்வில் ஏற்றுக்கொள்ளும் அழைப்பிற்குப் பதிலளித்தனர். ஜெபத்தின் போது, குறிப்பிட்ட நபர்களின் குறிப்பிட்ட பெயர்களையும் வாழ்க்கையையும் தேவன் வெளிப்படுத்தினார். தேவனின் பிரசன்னம் மக்கள் மத்தியில் இறங்கியதால் நோயின் சங்கிலிகள் உடைந்தன.

மங்கலான பார்வை மீட்டெடுக்கப்பட்டது. முடமானவர்கள் நடக்க ஆரம்பித்தனர் மற்றும் நாள்பட்ட நோய்கள் மறைந்துவிட்டன என்று ஏராளமான மக்கள் சாட்சி கூறினார்; பிறப்பிலிருந்து முற்றிலும் காது கேளாதவர்களுக்கு முதல் முறையாகக் காது கேட்க ஆரம்பித்தது.

சோரெங்கில் அவர் செய்த மகத்தான செயல்களுக்காக நாம் தேவனுக்கு எல்லா மகிமையையும் செலுத்துகிறோம். சோரெங்கிலுள்ள தேவாலயங்களின் ஒன்றுபட்ட முயற்சியைத் தேவன் கௌரவித்து ஆசீர்வதித்தார். அவர்கள் இரவும் பகலும் உழைத்து, பல மாதங்கள் உபவாசத்திலும் ஜெபத்திலும் ஈடுபட்டு, தேவன் பலரின் வாழ்க்கையைத் தொட வேண்டுமென விரும்பினர். தேவன் அவர்களின் மன்றாட்டு ஜெபத்தைக் கேட்டார். அல்லேலூயா!