சாது ஐயாவின் சாட்சி

சுந்தர் செல்வராஜ், ஒரு பக்தியுள்ள இந்துக் குடும்பத்தில் வளர்ந்தார். அவருக்கு இரண்டு சகோதரிகள் மற்றும் தம்பி ஒருவரும் உள்ளனர். அவருக்கு ஏழுவயதாக இருந்தபோது, அவரது தந்தை ஒரு பூசாரி ஆனார்.

வாலிப வயதில் இருந்த சுந்தர், மூத்த ஆண் பிள்ளையாக இருந்தபடியால், தமது தந்தையின் அடிச்சுவடுகளைப் பின்பற்றி வைராக்கியமுள்ள இந்துவாக மாறினார். அவர் மந்திரங்களைப் படிக்கத் தொடங்கினார். மதம் தொடர்பான பூஜைகள் செய்வதில் கைதேர்ந்தவராய் இருந்தார்.

அவர் மூன்று ஆண்டுகளாக இந்து மதத்தின் நேர்த்திக்கடன் சடங்கான காவடியைச் சுமந்தார். அவருக்குச் சுமார் 16 வயதாக இருந்தபோது, அவரது உள்ளத்தில், ‘கர்மம்’ எனும் விதி, 'மரணத்திற்குப் பிந்திய வாழ்க்கை' மற்றும் 'முக்தி' பற்றி கேள்விகள் எழுந்தன. அவர் விரதம், தவம் மற்றும் பூஜைகளின் மூலம் இந்து தெய்வங்களின் அருளைப் பெறவும், மறுபிறப்பு வாழ்விலிருந்து விடுபடவும், பிரம்மாவுடன் ஒன்றாக இருக்கவும், பிரபஞ்ச ஆற்றலுடன் ஐக்கியப்படவும் வேண்டுமென வேண்டினார். ஆனால் அவரது அனைத்து முயற்சிகளும் தோல்வி அடைந்தன.

ஆறுமாத காலமாக அவர் ஏறெடுத்தத் தீவிர பிரார்த்தனைகள் பயனளிக்கவில்லை. பிறகு, அவர் தமது மோசமான கர்மம் காரணமாக இந்த உலகில் மீண்டும் மீண்டும் மறுபிறவி எடுப்பதைத் தவிர்க்க முடியாது என்ற முடிவுக்கு வந்தார்.

ஜூன் 1978-ஆம் ஆண்டில், அவர் ஒரு பொது அரங்கில் நடைபெற்ற, 'அறிவியல் மற்றும் மதம்' குறித்த விரிவுரையில் பங்கு கொண்டார். புகழ்பெற்ற பேச்சாளர் ஒருவர் மனிதப் பரிணாமம் பற்றிப் பேசினார். வாலிபரான சுந்தர் அறிவியல் மீது மிகுந்த ஆர்வம் கொண்டிருந்தார், மேலும் ஒரு நரம்பியல் அறுவை சிகிச்சை நிபுணராக ஆக வேண்டும் என்ற திட்டத்தில் இருந்தார். பரிணாமம் பற்றி அரை மணி நேரம் பேசிய பிறகு, பேச்சாளர் பரிணாம விஞ்ஞானத்தைத் தேவனால் உருவாக்கப்பட்ட சிருஷ்டிப்பின் அறிவியலுடன் ஒப்பிட்டு பேசினார்.

அறிவியல் மீது சுந்தருக்கு ஆர்வமிருந்தாலும் இயேசுகிறிஸ்துவைப் பற்றிய போதனை அவருக்குப் பிடிக்கவில்லை. "தேவன் மனிதன் மீது வைத்திருக்கும் மிகுந்த அன்பின் காரணமாக, அவர் இந்த உலகத்தின் பாவங்கள் அனைத்தையும் நிவிர்த்தி செய்வதற்காக ஒரு மனிதனாகப் பூமிக்கு வந்தார். கர்த்தராகிய இயேசுகிறிஸ்துவை விசுவாசிப்பதின் மூலம் மட்டுமே மனிதன் தன்னைப் பாவத்திலிருந்தும் மரணத்திலிருந்தும் விடுவிக்க முடியும்" என்று அந்தப் பேச்சாளர் கூறினார்.

தேவ செய்திக்குப் பிறகு, அதே பிரசங்கியார், இயேசுகிறிஸ்துவைத் தங்கள் சொந்த இரட்சகராக ஏற்றுக்கொள்ள விரும்பும் அனைவரையும் மேடைக்கு முன்வருமாறு அழைப்புவிடுத்தார். சுந்தர் மனதில் 'முன் செல்லவேண்டும்' என்ற உந்துதலை உணர்ந்தாலும், ஒரு வைராக்கியமான இந்துவாக இருந்ததால் அவர் அந்த அழைப்பிற்கு அடிபணியவில்லை. திடீரென்று, அவருக்குள் உள்ளத்தின் ஆழத்திலிருந்து, ஒரு தெளிவான சத்தத்துடன் ஒரு குரல் அவரிடம் பேசுவதைக் கேட்டார்.

"இவர்தான் (கர்த்தராகிய இயேசுவே ) உண்மையான தெய்வம். சென்று, அவரைப் பின்பற்று!" என்றது அந்தக் குரல். முன்னோக்கிச் சென்று கர்த்தராகிய இயேசுகிறிஸ்துவைத் தனது இரட்சகராக, கடவுளாக ஏற்றுக்கொள்ளுமாறு சொன்ன அந்த அழைப்பின் சத்தத்தைக் கேட்டு சுந்தர் ஆச்சரியப்பட்டார். அவர் அந்தக் குரலைப் புறக்கணித்தார். ஆனால், ஒரு தானியங்கி ஒலிப்பேழையைப் (ஆட்டோ ரிவர்ஸ் கேசட் பிளேயர்) போல, குரல் மீண்டும் மீண்டும், "இதுதான் உண்மையான தெய்வம், சென்று அவரைப் பின்பற்று!" என்று கூறியது.

சுந்தர் இன்னுமொரு தெய்வீகமான அனுபவத்தை உணர்ந்தார் . அவர் அமர்ந்திருந்த நாற்காலி குலுங்கத் தொடங்கியது. நாற்காலி அவரை எழுந்து செல்லத் தூண்டுவது போல் இருந்தது. அவர் நாற்காலியின் கைப்பிடிகளைப் பிடித்தார். ஓர் அங்குலம் கூட அசையவில்லை.

அந்தக் குரல் அதிக நேரம் மீண்டும் மீண்டும், "இவர்தான் (கர்த்தராகிய இயேசுவே ) உண்மையான தெய்வம். சென்று அவரைப் பின்பற்று!" என ஒலித்தது. சுந்தர் இப்போது விவரிக்க முடியாத இரண்டு தெய்வீகமான அனுபவங்களை அனுபவித்துக்கொண்டிருந்தார். பின்னர் திடீரென்று, ஒரு கை அவர் முதுகுக்குக் கீழே தொடுவதை உணர்ந்தார். கை மெதுவாக அவரை எழுந்து நிற்க வைத்தது. குழப்பமடைந்த சுந்தர் மனதில் ஒலிக்கும் தேவ சத்தத்தை எதிர்ப்பதை நிறுத்தினார். பின்னர் கண்ணுக்குத் தெரியாத அந்தக் கை அவரது கையைப் பற்றிக்கொண்டு, மூன்றடுக்குப் படிகளில் இருந்து அவரை மெதுவாக மேடையின் முன்பக்கத்திற்கு அழைத்துச் சென்றது.

கர்த்தராகிய இயேசுவைச் சொந்த இரட்சகராக ஏற்றுக்கொள்ள முன்வந்த சுமார் 50 பேருடன் அவரும் சேர்ந்து நின்றார். மேல்நோக்கிப் பார்த்த சுந்தர், "இயேசுவே உண்மையான தெய்வமாக இருந்தால், மறுபிறப்பு வாழ்விலிருந்து என்னை விடுவிக்க உதவுங்கள்" என்றார். 'இயேசுவே என் வாழ்வினில் வாரும்' என்று அந்தப் பிரசங்கியார் சொன்னதை சுந்தரும் திரும்பவும் சொன்னார்.

அவர் அந்த வார்த்தைகளைச் சொன்னவுடன், அவர் எதிர்பாராத மற்றொரு தெய்வீக அனுபவத்தை உணர்ந்தார். யாரோ ஒருவர் தனக்கு எண்ணெய் போன்ற ஒரு திரவியத்தைத் தலையில் ஊற்றுவதை அவர் உணர்ந்தார். அது அவரது தலையில் கொட்டி அவர் உடல் முழுவதும் வடிந்து கீழ்நோக்கிப் பாயத் தொடங்கியது. எண்ணெய் அவர்மீது வடிந்துகொண்டிருந்தபோது, அவரது இதயத்திற்குள் ஒரு சுத்திகரிப்பு நடப்பதை உணர்ந்தார். அவரது அனைத்துப் பாவங்களும் சுய இச்சைகளும் கழுவப்பட்டு, சுத்தம் செய்யப்பட்டதைப் போல உணர்ந்தார்.

எண்ணெய் அவரது கால் விரல்களுக்குக் கீழே பாய்ந்துகொண்டே இருந்தது. அவரது கால்விரல்களில் இருந்து எண்ணெய் வெளியேறியபோது, விவரிக்க முடியாத ஒரு பெரிய சமாதானம் அவரை முழுவதும் நிரப்பியது. தேவன் அவருக்கு நான்கு ஆவிக்குரிய அனுபவங்களை வழங்கிய பிறகு, 'உண்மையில் இயேசுகிறிஸ்து ஒருவரே மெய்யான தெய்வம்' என்று சுந்தர் முற்றிலும் நம்பினார். பின்னர் அவர் மனப்பூர்வமாகக் கர்த்தராகிய இயேசுகிறிஸ்துவுக்குத் தம் வாழ்வை அர்ப்பணித்து, அவருடைய பக்தியுள்ள சீடரானார்.